Klubi i mirënjohur nga Kumanova, Bashkimi, i cili në vitin 2004/05 pati bërë historinë në futbollin e Maqedonisë, duke fituar kupën, është duke i zhvilluar garat në ligën e tretë të Maqedonisë – grupi i veriut.

Kjo skuadër që drejtohet nga trajneri preshevar, Enver Sahiti e ka mbyllur sezonin vjeshtor në vendin e katër me 29 pikë, 14 pikë më pak se sa lideri aktual Maxhari nga Shkupi. Para fillimit të gjysmësezonit të dytë kemi zhvilluar një bisedë me kryetarin e KF Bashkimi, Lutfi Hyda, i cili me kënaqësi pranoi të flas për situatën e tanishme dhe planet e klubit në të ardhmen.

-         Z. Hyda ka një kohë të gjatë që i mungoni opinionit futbolldashës. Ku jeni dhe ku mund të ju gjejmë më shpesh për t’ju pyetur rreth KF Bashkimi?

-         Hyda: E keni shumë lehtë për të më gjetur, jo vetëm ju, por kush të dojë. Unë për çdo ditë jam në ambientet e klubit dhe këtu mund të më gjeni kur të dëshironi.

-         Çfarë ka të re në klub. A keni filluar me përgatitje?

-         Hyda: Jo, nuk ka diçka që mund të veçoja. Kemi nisur të stabilizohemi që është më kryesorja. Bashkimi me përgatitje do të filloj nga fundi i muajit janar. Kështu është paralajmërimi nga trajneri. Shpresoj të nisim me kohë dhe të përgatitemi sa më mirë për ediconin e pranverës.

-         Cilët janë objektivat e Bashkimit. Sipas gjendjes në tabelë dukeni pa shpresa për të rrezikuar liderin e ligës, Maxharin?

-         Është e vërtetë se jemi shumë mbrapa nga Maxhari, madje 14 pikë, por ne nuk dorëzohemi. Do të luftojmë deri në fund për të luftuar për titullin e kampionit në ligën e tretë. Derisa të luhet futboll shpresat ekzistojnë, kampionati është i gjatë. Edhe orarine kemi të volitshëm. Maxharin e presim në Kumanovë. Unë jam optimst se mund t’i arrijmë ata.

-         Sa mund të kuptoj ju planifikoni ta avanconi Bashkimin në kategori më lartë, nëse jo sivjet, atëherë sezonin tjetër?

-         Hyda: Ne dëshirojmë që sivjet të ngjitemi në një rang më të lart garash, por nëse nuk ndodh sivjet, atëherë stinorin e ardhshëm gjithsesi. Kemi një grup shumë të mirë të futbollistëve të talentuar dhe cilësorë. Lojtarët janë të rinj, sillen nga mosha 20-22 vjeç E kemi një Qenan Bislimi që disa klube e kanë kërkuar, por ne nuk kemi pranuar ta shesim, ka edhe disa të tjerë. Dua të them se Bashkimi ka një ardhmëri të madhe të lojtarëve me perspektivë. Tani po e shoh se sa ka qenë e dobishme hapja e shkollës së futbollit Bashkimi në vitin 2002. Të gjithë ata fëmijë që patën ardhur për tu regjistruar sot i takojnë ekipit të parë. Kështu që në këtë drejtim jemi shumë të fortë. Me dy-tre lojtarë me përvojë do të luajmë një rol të rëndësishëm edhe në ligën e dytë.

-         Synim i juaji është liga e dytë, apo...?

-         Hyda: Jo, unë këtu s’dua të ndalem. Unë e di ku e ka vendin Bashkimi. Këtë e di edhe grupi i tifozëve Ilirët, por edhe të gjithë të tjerët në Maqedoni. Bashkimi e ka vendin në ligën e parë. Shpresoj që me ndihmën e Zotit viti 2014 Bashkimin ta gjej në ligë të parë. Këtë po ua premtoj edhe “Ilirëve”. Dëshiroj që edhe njëher të pushtoj futbollin e Maqedonisë dhe atë europian. Për Bashkimin sërish do të shkruhet dhe do të dëgjohet.

-         Dhe, në fund me siguri jeni duke i ndjekur zhvillimet në futbollin e Maqedonisë. A do të mundej Bashkimi të garonte me sukses në kampionatin vendor?

-         Hyda: Natyrisht se jam në rrjedh të zhvillimeve të futbolit në vend. Jam në kontakte të vazhdueshme me kreun e FFM-së, me të cilët u pajtuan që ndeshja miqësore e të rinjve të Italisë dhe Maqedonisë të luhet në Kumanovë, të martën. Sa i përket pyetjes tjetër them se futbollli në vendin tonë ka stagnuar dhe Bashkimi pa kurrfarë problemi do të garonte në ligën e parë. Për nga kualiteti pak dallojmë nga skuadrat e kategorisë së parë. Ne kemi një skuadër me futbollistë që premtojnë shumë.

         Intervistoi: Reshat IBRAHIMI

G.K

Sporti shqiptar

Edoni është nxënës i shkëlqyeshëm. I tillë është edhe në klubin e tij Flamurtari. Është golashënues i dalluar. Edoni shpreson se një ditë do të bëhet lojtar i madh botëror dhe do të përfaqësoj denjësisht Kosovën në arenën ndërkombëtare.

Edon Zhegrova është djaloshi simpatik nga Prishtina që shkëlqeu në “Milan Junior Camp” të mbajtur në Prishtinë. Edoni, nga ekipi i trajnerëve italian ishte përzgjedhur si më i miri në mesin e pesë bashkëmoshatarëve të tij që të jenë pjesë e Akademisë së futbollit të klubit më të trofeshëm evropian “AC Milan”.

Këtë fund vit kur përmbledhen sukseset e shënuara gjatë vitit dhe shpërblehen më të dalluarit, nuk u anashkalua as Edoni dhe emri i tij zuri vend në shumë nga këto evenimente.  Kjo ishte arsyeja që për juve lexues të nderuar të “albaspox.com” të bëjmë një intrvistë ekskluzive me këtë talent dhe shpresë të madhe të futbollit kosovar për të ardhemen.

Tre-me-te-dalluarit-e-LRF-te-Prishtines

albaspox.com: Edon tregona fillimisht në cilën klasë shkon dhe si të shkojnë punët me mësime ?

Edoni : Unë jam nxënës i shkolles fillore “Gjergj Fishta” në Prishtinë. Shkoj në klasë të VII (shtatë) dhe në mësime jam i shkelqyeshëm .

albaspox.com: Futbollin e ke aktivitetin kryesor te sportit. Prej kur je i regjistruar ne klub te futbollit ?

Edoni : Unë jam regjistruar në shkollën e futbollit që nga mosha gjashtë vjeçare. Fillimisht fillova me trajnime stërvitore në klubin FC Prishtina  Aty u stervita një kohë pastaj kalova tek klubi KF.Flamurtari ku edhe jam momentalish.

albaspox.com: Edon Zhegrova në moshën 12 vjecare u bë fytyrë publike. Të tillë të bëri epiteti i më të mirit në Kampin e futbollit që organizoi AC Milan në Prishtinë? Çka do të thot kjo për ty ?

Edoni: Kjo për mua do të thot shumë duke pas parasysh se AC Milan është ekip i njohur ndërkombëtar dhe është klubi më i trofeshëm në botë. Përzgjedhja ime nga ky klub me ka nxitur që të vazhdoj edhe më shumë të punoj.

albaspox.com : Edon kur ke shkua në konkurim për Akademinë e AC Milan-it në Prishtinë, a ke besuar paraprakisht se do të jesh i përzgjedhur në mesin e 5 më të mirëve ?

Edoni: Shpresën e kam pasur gjithmon duke pas parasysh talentin, përkrahjen e familjes dhe trajnerit tim Agim Hoxha, pastaj angazhimin tim të madh dhe po ashtu edhe të klubit Flamurtari. Unë edhe në klubin tim jam zgjedhur si lojtari më i mirë në grupmoshën time. Falenderoj edhe prindërit e mi që më kan përkrahur dhe po më përkrahin në çdo aspekt.

albaspox.com: Cila është tash agjenda jote në raport me Akademinë e AC Milan. Kur do të shkosh atje dhe a e din si do të vazhdoj puna e shkollimi në Milano ?

Edoni: Unë jam duke stërvitur rregullisht dhe jam duke punuar në taktikat e ndyshme sa i përket futbollit, ndërsa kur do te shkoj atje presim konfirmimin nga ana e klubit AC Milan.

albaspox.com: Edon jemi në fund të vitit 2011, si do ta shënosh këtë vit, shumë i sukseshem për ty personalisht ?

Edoni: Unë jam shumë i lumtur qe ky vit ka qenë shumë i sukseshëm për mua dhe përpos që jam zgjedhur si ma i miri i “AC Milan Junior Camp” , nga Federata e Futbollit të Kosoves jam zgjedhur edhe si më i miri i kategorive të reja (fatosave) për vitin 2011 dhe po ashtu nga Komuna e Prishtinës jam zgjedhur “Shpresa e vitit” për 2011.

albaspox.com: Edon tash kur ti i ke 12 vjet po flasim për pranim tuaj në Akademinë e AC Milanit. Por athua çka do të flasim për lexuesit në “albaspox.com” , pas 10 vitesh kur ti do t’i kesh 22 vjet ?

Edoni: Unë do të punoj maksimalisht që suksesi im të vazhdoj edhe në të ardhmen duke shpresuar se do të bëhem një lojtar i madh botrorë dhe besoj se do të kem mundesinë për ta prezantuar edhe Kosovën në arenën Ndërkombëtare.

albaspox.com: A ke ndonje porosi për moshataret tuaj apo ata që duan ta kenë një fat sikur ti ?

Edon: Unë i porosis të gjithë bashkëmoshatarët e mi që të vazhdojnë të merren me futboll dhe të angazhohen maksimalisht për suksese, ato nuk do te mungojnë. Njëherit meqe jemi ne fund te vitit , atëherë ju uroj të gjithë lexuesve tuaj dhe dashamireve të sportit Vitin e Ri 2012.

Intervistoi: Esad EJUPI

Foto: Gani KOSUMI

Sporti shqiptar

I njohur si atleti i shkolluar i viteve ’60-‘70, Kamber Ejupi (foto 1) ka qenë ndër sportistet më të suksesshëm të asaj kohe në atletikën kosovare.

Dashamirët e sportit vendor të viteve ’60 -‘70 e kanë të pa harruar emrin e atletit të suksesshëm kosovar të asaj kohe, Kamber Ejupi.

Kamber Ejupi ka qenë ndër sportistët e paktë në atë kohë në Kosovë që edhe praktikisht edhe teoretikisht ka qenë i përgatitur për profesionin e tij.

Praktikisht me fizikusin e tij që nuk gabojmë nëse e përmbledhim me fjalinë “trup atleti”,  ndërsa teoretikisht sepse Kamberi kishte mbaruar me sukses studimet në Fakultetin e Kulturës fizike të Sarajevës në vitin 1977.

 Një kohë të gjatë Kamberi ka punuar si Profesor i lëndës Edukata fizike, ndërsa aktivitetin prej sportisti të devotshëm nuk e ndali asnjëherë. Në vitin 1981 Kamber Ejupi zgjedhet Sekretar i Lidhjës Atletike të Kosovës ku punoj deri në vitin 1992 kur u largua nga masat e dhunshme të asaj kohe.

Kamber Ejupi ka qenë ndër garuesit e suksesshem të Kosovës në disiplina të ndryshme të vrapimit, por kryesisht në ato 100 metra, 200 metra, 400 metra dhe  400 metra me pengesa. Pikërisht në këto displina Kamberi ka shënuar rezultatet e veta më të mira. Në garat ndërkombëtare në vitin 1968 në Zagreb, Kamber Ejupi kishte zënë vendin e katërtë në disiplinën vrapim 400 metra me pengesa. Një vit më vonë, pra 1969, po ashtu në gara ndërkombëtare në qytetin Wolgograd të Rusisë, Kamber Ejupi zuri vendin e parë në disiplinën 200 m. me pengesa.

Në një takim rasti që patëm këto ditë me Kamberin, në shtepinë e tij në Prishtinë, ai me fotografi e fjalë evokon kujtime nga e kaluara e tij te pasur sportive. Në mesin e fotografive të shumta që tregojnë dhe portretizojnë karrieren e begatshme sportive të tij, na ra të shohim edhe një fotografi të bërë në vitin 1971 në Orllan, buzë Liqenit të Batllavës. Kamber Ejupi , atëhere në cilësinë e mësuesit të notit, (shihet në fotografinë e dytë në muri)  me një grup të rinjësh nga këto anë. Në mesin e njomakëve të moshave 9-12 vjeçare shihej edhe Komandanti legjendar i Ushtrisë Çlirimtare të Kosovës, Zahir Pajaziti.

Po ashtu, Kamberi rrëfen se si në vitin e largët 1980 në Elbasan të Shqipërisë kishte përfaqesuar si kapiten, Reprezentacionin e Kosovës në garat e atletikës përballë Reprezentacionit të Shqipërisë. Këtë e dokumenton edhe me fotografi nga kjo ngjarje të cilat me krenari i ruan në korniza dhe të vendosura në muri (foto 3).

Aktualisht jeta e Kamber Ejupit është në vijën Wisbaden (Gjermani) – Prishtinë (Kosovë) .

Gjatë kësaj vere Kamberi ka qëndruar në Prishtine dhe përgjithësisht në Kosovë dhe ka pasur rast që më për së afërmi të përcjell jetën sportive këtu, për të cilen thotë:

Kamber Ejupi: “Në Kosovë degët e ndryshme sportive do të zhvilloheshin me shumë dhe do të arriheshin rezultate shumë më të mëdha sikur ato të drejtoheshin nga njerzit profesionistë të fushave. Është fatkeqësi te ne, jo vetëm në sport, por edhe në degë e veprimtari të caktuara, që ato nuk drejtohen nga njerzit që janë njohës të asaj dege apo veprimtare. Për këtë arsye mungojnë edhe rezultatet. Zhvillimi i degëve sportive në Kosovë është duke marrë shumë kohë, nuk e di a kemi kohë që të humbim kështu ? Ne edhe ashtu kemi qenë të shtypur nga ish regjimi dhe kemi zhvilluar sportin vetëm sa për të mbijetuar. Tashmë ajo kohë ka kaluar. Sporti është një nga shtyllat e shtetësisë së një vendi. Duhet shumë punë, por duhet edhe shumë më shumë profesionalizëm. Nuk mjafton vetëm entuziami dhe dëshira.

Më tutje , Kamberi vazhdoi :” Sporti është shëndet. Qysh në kohërat e lashta, egjiptiane, greke e romake, sporti bashkë me medicinën e matemetikën kanë qenë fusha me prioritet. Kështu është edhe sot në vende të zhvilluara. Kështu do të duhej të ishte çdo herë, por kjo varet nga kultura dhe udhëheqjet e shteteve. Vendi ynë ofron shumë pak hapësirë për sportistë. Mungojnë terenet sportive, palestrat, pishinat.” ka thënë Ejupi.

Ndërsa në pyetjen tonë për një krahasim të rezultateve të shënuara në degë të ndryshme të atletikës në kohën kur ai ka qenë aktiv dhe rezultateve që shënohen sot, Kamber Ejupi tha: ”Nëse bëjmë një krahasim të rezultateve të këtyre dy periudhave pikërisht këtu shohim realitetin e dhembshëm kosovar që fatkeqësisht është i tillë. Nëse i kujtojmë atletët e atyre kohrave si bie fjala Adnan Demalia, Naim Malazezi e shumë të tjerë, ata kanë shënuar rezultatet të jashtëzakonshme. Edhepse po flasim për një periudhë shumë më të hershme, e di mirë se atëherë është punuar me mjaft profesionalizëm, si në aspektin fizik ashtu edhe teknik e taktik. Unë me kënqësi do të isha në shërbim të gjithë atyre që kanë nevojë për këshillime profesionale, për trajnime të trajnerëve etj. Jo vetem atletet, por edhe trajnerët sportiv duhet që për çdo vit të freskohen me njohuri të reja , të mësojnë metodologji të reja të punës”.

Talenti për aktivitete sportive dhe puna e palodhshme janë pjesë e familjes Ejupi. Përpos Kamberit që është marr me atletikë, nga familja e tij janë edhe dy vajzat, që kanë zhvilluar me sukses të madh aktivitete në degë  të ndryshme sportive. E para, është Pranvera Ejupi që ka qenë e jashtëzakonshme në hudhjen e shtizës. Ajo për shumë vite ka qenë Kampion Kosove, si dhe kampione republikane në ish shtetin e atehershëm. Ndërsa, Shkurta Ejupi në moshën prej 14-19 vjet ka shkëlqyer në garat e tenisit. Pikërisht suksesi i madh në fushën e tenisit i ka mundësuar që të jetë fituese e bursës së plotë dhe  të fitoj të drejtën e studimit në Universitetin e Atlantës në të cilin me sukses ka mbaruar studimet e larta të menaxhmentit dhe marketingut.

Nga kjo del se familja e Kamber dhe Xhumnie Ejupit kanë qenë gjithmon vatër talentësh që me punë, dëshirë e përkushtim janë shëndrruar në profesionist të degëve të ndryshme sportive.

Në fund të kësaj bisede, për ekipin albaspox.com, Kamber Ejupi dhuroi një libër të tij të titulluar “Shëndeti” , në të cilen bashkëautor ka gruan e vet Xhumnie Lila – Ejupi.

Fjalia kryesore në këtë libër të autorëve Kamber Ejupi e Xhumnie Lila – Ejupi që i dedikohet shëndetit është:  “Është aq i shtrenjët sa qe nuk ka me u ble” !

albaspox.com

Sporti shqiptar

Kombetarja jone pas humbjes se pesuar ne Bosnje – Hercegovine i ka humbur njekohesisht edhe shanset per te arritur ndonje kualifikim te mundshem ne “Euro 2012″. Ne ndeshjet e mbetura eliminatore, Shqiperia do te perballet me kundershtaret me te forte te grupit D. Ne Tirane, gjate muajve shtator dhe tetor, ekipin tone e presin ndeshjet e veshtira me Francen, qe kryeson grupin, dhe me Rumanine, qe pretendon te arrije vendin e dyte. Ne nje interviste per “Koha Jone” mesfushori i kombetares Jahmir Hyka vlereson rendesine e ketyre dy perballjeve dhe thote se kuqezinjte kane mundesi per te marre rezultate pozitive, me qellim qe te vazhdojne progresin e nisur ne fillim te ketyre eliminatoreve:

Si po ecen eksperienca juaj me Luzern te Zvicres?

- Kam gati tre jave qe kam kaluar tek skuadra zvicerane e Luzern dhe si ne fillimet e mia them se cdo gje po ecen mjaft mire. Sic ndodh gjithmone, per nje lojtar, kur nderron ekip, problemi i pare qe del eshte ambientimi i tij me skuadren e re. Por dalengadale po ambientohem mire me skuadren time te re dhe besoj se shume shpejt do te gjej veten pjese te skuadres se Luzern, per te dhene me tej me te miren e mundshme tek kjo skuader.

Cili eshte synimi juaj i ketij sezoni, ne Zvicer?

- Dua te kontribuoj sa me shume ne objektivin e skuadres sime. Objektivi i skuadres eshte qe te arrijme Kupat e Evropes. Fillimi i kampionatit ishte i mbare. Fituam ndeshjen e pare jashte fushes sone, me rezultatin 3-0. Shpresojme te ecim me kete ritem, deri ne fund, per te arritur objektivat tona.

Me ekipin kombetar keni pasur luhatje ne ekip. A jeni i kenaqur me aktivizimin tuaj?

- Ne ndeshjen e fundit jam aktivizuar shume pak minuta me ekipin kombetar. Normal, qe kam me shume pretendime per te luajtur dhe nuk me vjen mire, kur qendroj ne stol. Megjithate, mendoj se deri tani nuk jam perfshire ne formacionin e pare, ngaqe nuk kam luajtur rregullisht me ekipet ku kam qene gjate sezonit te fundit (Mainc 05 dhe Panionios). Shpresoj qe tani pas kalimit tek Luzern e Zvicres te perfshihem me shume dhe te me krijohen hapesirat e duhura ne ekipin kombetar.

Kombetarja do te luaje dy ndeshjet e radhes per eliminatoret “Euro 2012″, ndaj Frances dhe Rumanise.

Ndeshjet e ardhshme te kombetares mendoj se do te jene me te veshtira, se takimet e deritanishme te grupit tone. Duket mire se cila eshte forca e ketyre dy kundershtareve, ndonese ne do te luajme ne fushen tone. Por kombetarja jone nuk ka se cfare humbet, keshtu qe do te perpiqemi qe te japim maksimumin dhe te marrin pjese nga nje rezultat pozitiv, per te shpresuar ne fund, ne nje pozicion me te mire ne grupin tone eliminator.

A mendoni se ka ardhur momenti qe ne ekipin kombetar te luajne futbolliste me me shume eksperience?

Nuk duhet mohuar qe aktivizimi i lojtareve me eksperience ka qene dhe do te mbetet i rendesishem ne lojen e ekipit tone kombetar. Megjithate besoj qe edhe aktivizimi i lojtareve te rinj eshte gjithashtu i domosdoshem. Per te siguruar nje ekip sa me te forte, ne nje te ardhme te afert, i ngelet trajnerit dhe stafit te tij per te gjetur lojtaret e duhur, per ekipin tone.

Intervistoi: Aranit Muraci/kohajone

Sporti shqiptar

Fatos Beqiraj : “Unë jam nga Kosova dhe e gjithë familja ime jeton atje, por fatkeqësisht akoma Kosova nuk e ka të drejtën të luaj ndeshje kualifikuese. Kam biseduar me familjen dhe miqtë e mi dhe pastaj kam vendosur që të luaj për reprezentacionin e Malit të Zi”

Fatos Beqiraj në skuadren Dinamo të Zagrebit është që nga shtatori i vitit 2010. Atje shumë shpejt arriti që të zë vend në formacionin bazë të kësaj skuadre e po ashtu edhe t’i fitoj zemrat e publikut zagrebas. Ai tashmë është shëndrruar në golgeter të Dinamos, në lojtar shumë të rëndësishëm të saj dhe në idhull të dashamirëve të futbollit në Zagreb.

Fatos Beqiraj ka dhënë një intervistë për ueb faqen zyrtare të Dinamos një pjesë nga e cila juve lexues te nderuar , ua sjell portali i juaj “albaspox.com” .

Karrieren si futbollist e keni nisur në Shqiponjën e Pejës në të cilën shumë shpejt jeni bërë lojtar standart dhe pastaj keni kaluar te Buducnosti i Podgoricës.

Fatos Beqiraj: Kam filluar të ushtroj futboll qysh në moshën 10 vjeçare ndërsa edhe më herët kam luajtur me shokët e mi. Klubi i parë në të cilin jam bashkuar ka qenë Shqiponja nga Peja, klub ky i cili për shkaqe financiare tashmë nuk ekziston. Këtu kam mbaruar shkollen dhe kur i kam mbushur 16 vjet kam qenë pjesë e formacionit të parë të skuadrës. Për ekipin e parë kam luajtur 1 vit e gjysmë dhe pastaj kanë filluar të më vijnë oferta nga Prishtina dhe nga disa klube tjera, por unë pa u menduar shumë kam pranuar ofertën e Besës së Pejës. Pse? Sepse klubi ishte po ashtu nga Peja dhe kështu me mundësohej të jem pranë familjes, por edh për faktin se në këtë klub punohej mirë sepse ishin 3 herë kampion të Kosovës.Në Besa kam qëndruar vetëm 6 muaj dhe pastaj një mik i im me ka propozuar të kaloj te Buducnosti i Podgoricës. Kam qenë vetëm disa ditë në prova dhe ata u treguan të kënaqur me mua , edhe unë me ta dhe me vetëm 19 vjet kam nënshkruar kontratë me Buducnostin.

Në Mal të Zi keni fituar titullin e kampionit dhe keni qenë golashëuesi më i mirë i ligës ?

Fatos Beqiraj:  Në sezonin tim të parë me Buducnostin kemi fituar titullin e kampionit, ndërsa sezonin tjetër me 18 gola në kampionat dhe 7 për kupë kam qenë golashënuesi më i mirë i ligës. Në Podgoricë jam ndie mirë, kemi arritur rezultate të mira, ndërsa mua më erdhi ftesa për reprezentacionin e të rinjëve të Malit të Zi e pastaj edhe për reprezentacionin “A” të këtij vendi. Ndërsa pas dy vite e gjysmë te Buducnosti më erdhi ftesa nga Dinaom dhe ja ku jam.

Si u bë deri te kalimi i juaj në Dinamo ?

Fatos Beqiraj : I kam përcjellur mediet e Malit te Zi dhe të Kroacisë të cilat kanë shkruar për transferimin tim te Dinamo para ndeshjeve në arenën ndërkombëtare. E di që njerzit nga Dinamo më kanë përcjellur në dy ndeshje me Buducnostin. Më duket se ka qenë dita e fundit e afatit kalimtar dhe askush deri atëherë nuk  më kishte thirrur për të biseduar, dhe për një moment më thërrasin nga klubi dhe më thonë se janë marr vesh me Dinamon dhe se tani ka mbetur vetëm edhe unë ta konfirmoj atë marrveshje.  Unë isha i gëzuar dhe u thash se nuk është kjo problem fare sepse unë edhe ashtu dëshiroja të kaloja në një klub më të mirë evropian.Ashtu edhe ndodhi.

Nga Podgorica erdhët në Zagreb dhe pastaj direkt në “Polud” ?

Fatos Beqiraj : Kam ardhur nga kampi i reprezentacionit të Malit të Zi në Zagreb kam nënshkruar për Dinamon dhe pastaj jam kthyer te reprezentacioni i Malit të Zi. Pas ndeshjes me Bulgarinë përsëri jam kthyer në Zagreb, i kam zhvilluar dy stërvitje ndërsa ditën tjetër jemi nis për Split. Natyrisht se kam pas dëshirë të madhe të luaj në atë ndeshje sepse bëhej fjalë për një derbit të njohur botërisht, mirëpo nuk kam pritur minutazhë të madhe për arsye se vetëm sa isha ardhur. Kam nisur si rezervist ndërsa jam inkuadruar vetëm 15 minuta por qe isha shumë i lumtur për to.

Sa jeni të kënaqur me sezonen tuaj të parë te Dinamo ?

Fatos Beqiraj : Mendoj se sezona për klubin e po ashtu edhe për mua ka qenë e suksesshme. Kam ardhur nga një klub më i vogël në një klub më të madh siç është Dinamo, prandaj sigurisht se më është dashtë kohë për përshtatje. Kur unë kam ardhë në Zagreb, skuadra ka pas të zhvilluara disa xhiro të kampionatit dhe nuk kam pasur shumë kohë që të përshtatem ngadal. Për fat gjithçka ka shkuar shpejt dhe lehtë sepse të gjthë më kanë pritur dhe pranuar shumë mirë si njerzit në klub e po ashtu edhe bashkëlojtarët dhe publiku. Kemi fituar titullin e kampionit, kemi luajtur mirë në Euro Ligë dhe kemi fituar Kupën e Kroacisë. Natyrisht se klubi si Dinamo  gjithënjë kërkon më shumë dhe më mirë kështuqë edhe nga ekipi edhe nga vetja pres edhe më shumë në sezonin e ardhshëm.

Cilat janë pritjet tua për sezonin e ardhshëm ?

Nuk jam edhe shumë moti në Dinamo, por e di se ky klub çdo herë e ka ambicje titullin e kampionit të Kroacisë, kupën e këtij vendi dhe një hap përpara në garat evropiane, këtë e kam ditur edhe pa ardhur këtu. Sa i përket garave vendore jemi skuadra më e mirë në Kroaci dhe jam i bindur se kjo nuk do të ndryshoj as në vitin e ardhshem. Ndërsa garat evropine janë diçka tjetër. Varet shumë nga shorti dhe fati, por jam i sigurt se edhe atje do të shënojmë rezultate të mira.

Si keni vendosur që të luani për reprezentacionin e Malit të Zi  ?

Fatos Beqiraj : Pas një kohe të shkurtë te Buducnosti, Federata e futbollit atje menjëherë më ka thirrur dhe më ka ofruar të luaj për reprezentacionin e të rinjëve . Unë jam nga Kosova dhe e gjithë familja ime jeton atje, por fatkeqesisht akoma Kosova nuk e ka të drejtën të luaj ndeshje kualifikuese. Kam biseduar me familjen dhe miqtë e mi dhe pastaj kam vendosur që të luaj për reprezentacionin e Malit të Zi. Më duhet të them se njerzit nga Mali i Zi me kanë pritur dhe përkrahur shumë mirë. Pas disa paraqitjeve për reprezentacionin e të rinjëve shumë shpejt erdhi ftesa edhe nga Reprezentacioni “A” i Malit të Zi, te i cili kam debutuar në ndeshje kundër kampionit botëror Italia ku kam luajtur 25 minuta dhe kam plotësuar një ëndërr timen se mund të luaj kundër ekipeve të tilla.

Në ndeshje kundër Anglisë keni arritur rezultat fantastik ndërsa ju keni luajtur 10 minutat e fundit. Si jeni ndjerë pas përfundimit të ndeshjes në “Wembley” kur rezultati ka qenë 0:0.

Fatos Beqiraj : Është një përjetim i pa harrueshëm që do ta kujtoj gjatë gjithë jetës. Para disa viteve kam menduar të shkoj në “Wembley” si shikues dhe të shoh ndonjë ndeshje, ndërsa tani isha si futbollist nga ku dola me rezultat fantastik (0:0) kundër Anglise vendase. Të vraposh dhe të luash para 90.000 shikuesve është vërtet fascinuese.

Pergatiti: E.E.

Sporti shqiptar

Në vazhdim, lexues të nderuar,  portali “albaspox.com”  ju sjell një intervistë (të huazuar) të Albert Bunjkaut (foto) në të cilen futbollisti shqiptar i skuadres gjermane FC Nurnberg, me prejardhje nga Gjilani i Kosovës, që njëherit është edhe reprezentues i Zvicrës, është përgjegjur në 11 pyetje.

01. Cili është kujtimi i juaj i parë nga futbolli ?

Bunjaku: Me shokë në terrene të vogla  futbolli

02. Cili futbollist të ka pëlqyer në fëmijërinë tuaj ?

Bunjaku: Roberto Bagjo

03. Cili është goli i juaj më i dashur (bukur) ?

Bunjaku: Në Kupën DFB kundër Bayernit, pas 4 muajve lëndim.

04. Fantom dhe “Dora e Zotit” – a do të thoshe edhe ti kështu ?

Bunjaku : Jo

05. Cili është sistemi më i mirë i lojës ?

Bunjaku : 4-3-3

06. Cilën lojë e kujtoni me kënaqësi mrapa ?

Bunjaku: Ndeshjen time të parë në Kampionatin Botërore kundër Kilit.

07. A ke refuzuar ndonjëherë ndonjë marrveshje për futboll ?

Bunjaku : Po

08. Ku ka qenë goli i pare të cilin e ke shënuar ?

Bunjaku: Në Fahrweit (Cyrih)

09. Nëse psh keni fituar një udhëtim nëpër botë; në cilin stadion do të ndaleshit pa tjetër ?

Bunjaku: Unë do të shikoja me kënaqësi një ndeshje të Barcelonës në “New Camp”. Më së miri kundër Real Madridit.

10.  Çka të inatosë më së shumti ?

Bunjaku: Lëndimet

11.  Me cilin futbollist të njohur (nga histori dhe të tanishëm)do të doje që të ushtroje një ditë, dhe çka do të mësoje nga ai ?

Bunjaku: Me Ronaldon (Brazilian). Gjakftohësinë e tij para golit do ta dëshiroja me kënaqësi.

E përgatiti: E.Ejupi

Sporti shqiptar

Komuna e Prishtinës, respektivisht Drejtorati për Kulturë dhe Sport, në vitin 2011, ka në planprogramin e vet, zhvillimin dhe masovizimin e sportit në kryeqytet. Drejtoresha e këtij drejtorati Vlora Dumoshi, thotë se në këtë vit, Komuna e Prishtinës, planifikon që të shpenzojë rreth 600 deri 700 mijë euro. Këto mjete kanë të bëjnë me projektet e ndryshme kapitale në lëmin e sportit.

“Sivjet, Komuna e Prishtinës, me një seriozitet shumë të madh së bashku me Drejtorinë e Urbanizmit dhe me zyrtarë të sportit, kemi bërë një inspektim në qytetin ose në Komunën e Prishtinës se ku do t’i ndërtojmë terenet e ndryshme sportive. Komuna e Prishtinës, sivjet ka paraparë që t’i bëjë dy terene sportive tek Deponia, ish-Deponia në Vranjevc, do të jenë fusha të basketbollit dhe të hendbollit diku do të ketë edhe të futbollit, është proceduar edhe për katër terene në “Fushën e Pajtimit” aty do të bëhet një kompleks i madh sportiv me 12 fusha të sportit pra të llojllojshme, pra aty do të kemi fusha të basketbollit, futbollit, hendbollit dhe tenisit. Në pjesën kapitale, Komuna e Prishtinës parasheh që të investojë 600 – 700 mijë euro”.

Sipas Dumoshit, qytetarët e Prishtinës, do të kenë hapësira të shumta ku mund të zhvillojnë aktivitetet sportive. Ajo thotë se në lagjen “Bregu i Diellit”, do të ndërtohen dy fusha sportive.

“Pastaj do t’i kemi fushat sportive në Bregun e Diellit tek banesat e bardha, gjithashtu ne i kemi paraparë edhe hapësirat të cilat kanë qenë qysh moti fusha sportive si në lagjet “Ulpiana”, “Dardania”, të cilat tashmë janë në një gjendje jo të mirë, do të bëhet edhe renovimi i tyre sepse aty kemi pjesë të banuara me popullatë shumë të madhe. Gjithashtu, inspektimi nuk i ka kryer edhe të gjitha punët e veta, në disa lagje kah lagjja “Tauk Bahçe” do të mundohemi krejt qytetin ta përfshijmë së paku të bëjmë çoftë një teren, dy ose tri terrene sportive. Besoj se kjo ka me qenë një pasuri mjaft e madhe që do t’i dedikohet sportit”.

Ajo thotë se edhe më tej mungesa e Ligjit për kryeqytetin, bën që projektet e ndryshme kapitale të jenë të pakta për Prishtinën.

“Komuna e Prishtinës është shumë e interesuar për Ligjin për Prishtinën ku dhe aty kemi edhe Pallatin e Rinisë, të cilin ne e kosiderojmë se i takon Komunës së Prishtinës dhe në çoftë se kjo do të zgjidhet përmes parlamentit të Kosovës, pastaj të gjitha klubet sportive, angazhimet sportive, do ta kenë vendin aty”.

Dumoshi thotë se, në këtë vit, para së gjithash, planifikohet që të ndërtohet edhe fusha e patinazhit.

E. Thaçi

Sporti shqiptar

Ka disa vjet që një gjeneratë e re e trajnerëve në futbollin e Kosovës është duke u përgatitur që me një përkushtim më të madh të punojë në klube dhe në futbollin e Kosovës. Njëri ndër ta është edhe Gazmend Haliti, trajner i grupmoshave të reja në Shkollën e futbollit “Prishtina” dhe përzgjedhës i Përfaqësueses së Kosovës për U-15. Ai disa vjet me radhë së bashku me disa trajnerë të tjerë të Kosovës është duke i përcjellur seminaret edhe jashtë Kosovës, sidomos në futbollin gjerman, por edhe në Spanjë dhe shtetet e tjera. Në këtë mënyrë përvojat e marra nga trajnerët e njohur të futbollit botëror, ai së bashku me kolegët e tij po i përcjellin me sukses në futbollin e Kosovës për grup moshat e reja. Këto ditë Prishtina U-15 u bë fitues i Trofeut Bashkim Islami 2011  të cilët në finale me lojë të shkëlqyeshme mundën R.Sadikun 8-1.Për lexuesit e Portalit sportive albaspox.com, zhvilluam këtë bisedë:

Ju e keni pasur mundësi të testoheni edhe në Turneun shumë prestigjioz “Catalunia Cup 2010” në Spanjë?

Po është e vërtetë se gjatë qershorit të vitit 2010, Klubi i ffutbollit Prishtina me dy grupmosha U-15 dhe U-17 mori pjesë në këtë garë ndërkombëtare. Unë  mendoj se me pak fat kemi mundur te arrijmë sukese edhe më të madh, por dy barazime dhe një humbje dëshpruese, kur dihet se në çastet e fundit e humbëm penalltinë nga skuadra që më vonë u gjend në finale. Prishtina u dëshmua se ka potencial që në të ardhmen të ballafaqohet me skuadra edhe më të forta, me forca vetanake dhe pa asnjë përforcim nga klubet e tjera. Sa i përket grupmoshës U-17, ata të drejtuar nga trajneri Ali Osmani në një konkurrencë shumë të fortë në mesin e 33 ekipeve ia dolën që të plasohen në pozitën e pestë që është një sukses shumë i madh për ne.

Si e vleresoni ju këtë turne- Catalunia Cup?

Vetë fakti që organizohet nën Patronazhin e UEFA-së për 27 vjet me radhë, dëshmon për nivelin që ka ky turne. Në këtë turne kanë luajtur skuadra dhe lojtarë tashmë të dëshmuar në futbollin evropian dhe botëror si Fc Koln,Bayer Leverkusen etj. Për mua përsonalisht ishte një përvojë e mirë dhe një përshtypje që kurrë nuk harrohet. Gara të këtillua u nevojiten kueve të Kosovës, sepse vetëm përvoja u mungon të rinjëve tanë për garat ndërkobmëtare. Me kalimin e kohës jam i bindur se do të vijnë dtë më të mira.

A pritet që të merrni pjesë edhe në të ardhemn në ndonjë turne ndërkobmëtar ?

Unë mendoj se nuk duhet të ndalemi. Nese dëshirojmë të  arrijmë sa më lartë në futboll, shpresoj se me ndihmen e institucioneve më të larta sportive të Republikës së Kosovës dhe përkrahjen materiale mund të realizohen parashikimet tona. Në këtë drejtim do të bëjmë përpjekje që edhe nëpërmjet donatorëve të cilët e duan dhe dëshirojnë ta ndihmojnë sportin  të marrin pjesë në trune të ndryshme ndërkobmëtare. Vetëm në këtë formë futbolli për këto grup mosha mund të shkojë përpara.

Investimet ne klubin e juaj mesiguri do ju ndihmojnë për punë më cilësore?

Gjithsesi se dy fusha ndihmëse do të jenë një ndihmesë shumë e madhe, por nëse mendojme për profesionalizëm atëherë  për një të ardhme të afërt, Prishtina duhet ta ketë qendrën e të rinjëve dhe shumë fusha ndihmëse. Këto do të jenë parakushte të cilat duhet ti ketë një klub profesional. Vetëm me punë të mirëfillt me moshat e reja. Paramendoi unë kam hospituar  në shumë klube evropiane ku vetëm qendrat e të rinjëve kanë mbi dhjetëra fusha.

Sa jeni të kënaqur me garat rajonale dhe ato për kupë që janë duke u zhvilluar tash disa vjet ?

Puna dhe përkushtimi ynë me grupmoshat e reja ka dhënë rezultate të kënaqshme.Me grup moshën U-15 kemi fituar titullin e kampionit në rajonin e Prishtinmës dhe titullin e kampionit të Kosovës, por edhe jemi fitues të Kupës së Kosovës në këtë nivel të garave . Konsiederoj se kushtet për punë janë paksa të vështira. Këtu fjalen e kam për mungesën e infrastrikturës së mirëfilltë sportive, porn ë këtë drejtim besoj se në pranverë do të kryhen disa punë për fushat ndihmëse dhe për ne do të krijohen kushte më të mira për stërvitje me këto grup mosha. Përpos garave rajonale sa më parë duhet organizohen Ligat e Kosovës për grupmoshat e reja. Këtu e kam fjalën për U-15 dhe U-17. Pra pa një konkurrencë të fortë të garave nuk mund të presim  shumë edhe në ngritje të cilësisë. Në zgjedhjen e futbollistëve të rinjë nga LRF të Prishtinës nuk kemi pasur në mesin e të dalluarëve asnjë përfaqësues të Prishtinës ndonëse i kemi të fituar të gjithë troftetë e mundëshëm për vitin 2010.

Si është e mundur që në mesin e më të mirëve nuk gjendet asnjë futbollist i Prishtinës për vitin 2010?

Trajnerët të cilët punojnë me moshat e reja duhet ta kuptojnë se puna me të rinjë është shumë e ndieshme. Si është e mundur të lihen anash tre talentët më të medhenjë të Kosovës, fjala është për  Lorik Aliun dhe Fatlum Ramadanin e Fc Prishtina dhe Sahitin/R.Sadiku/  U-13 të cilëtt nuk ishin as në mesin tre më të mirëve. Ata fituan të tha trofetë e mundshëm. Konsederoj se trajnerët me këto grup mosha të cilët votuan duhet se me një kupë nuk bëhen futbollistë, por me këtë vlerësim humbin autoritetit evet te prindërit.

A mendoni se shkollimi i trajnereve  ndikon shumë edhe në këtë aspekt?

Po gjithësesi, unë kam specializuar per moshat e reja në Gjermani si dhe kam përcjell shumë seminare dhe kongrese ndërkombetare. Mendoj se pikërisht trajnerët e moshave duhet te licencohen, të edukohen ashtu siç e kërkon edhe UEFA, pra vetëm në këtë mënyre shkohet përpara me kushte dhe shkollim.

Ju diplomuat në Tiranë për  trajner të UEFA, cilat janë  pershypjet tuaja?

Së pari i falenderoj të gjithë ata të cilët e mundësuan licencimin tonë në forma të ndryshme. Ishte një pervojë shumë e mirë, kemi mësuarf shumë. Për mua personalisht ishte një kënaqësi pasi për herë te parë pata mundësi që në gjuhen shqipe të percjell seminar që gjithçka ishte profesionale me ligjërues italian dhe shqiptar.

Cilat janë planet tuaja për këtë vit ?

Punë djhe vetëm dhe vetem punë sepse ndryeshe nuk bënë. Do të bëjmë përpjekje që të marrim pjesë në ndonjë turne ndërkombetar.Të gjithë së bashku do të punojmë nga ngrisim cilësinë dhe sa më shpejt të pranohemi në garat ndërkombëtare. Për këtët ne duhet te jemi të gatshëm të kemi një bashkëpunim të mirë ndërmjet trajnerëve pa ndonjë xhelozi, sepse vetëm në lëtë mënyrët mund të shkojmë përpara.

Gani KOSUMI

Sporti shqiptar

Me rastin e shpalljes së futbollistit më të mirë të vitit 2010 nga Federata e Futbollit e Kosovës, në mesin e shumë myusafirëve ishte edhe trajneri i dikurshëm i Prishtinës, Fuad Muzuroviq i cili jeton dhe vepron në Sarajevë të Bosnjë e Hercegovinës. Ai ishte shumë i kënaqur që pas shumë vitesh gjendet në Prishtinë dhe takoi shumë miq dhe sportistë të dalluar të Kosovës. Ai dha një intevistë për Radio Kosovën.

Pas shume viteve perseri jeni ne Prishtine, si po ndjeheni?

Para se gjithash dua te faledneroj shokun tim te nderuar Fadil Vokrrin per ftesen qe te jem pjesemarres ne shpalljen e futbollistit me te mire te vitit. Me vjen mire qe u takova me shoqerine e vjeter, me te cilet kam kaluar 2 vite te paharrueshme dhe me duket sikur kjo ka qene dje, madje disa nga ata i kam takuar edhe ne Sarajeve dhe jam shume i emocionuar qe shoh shume shoke te vjeter.

Sa e percillni futbollin kosovar, sa keni njohuri per te?

Nuk jam shume i perfshire por sipas disa informatave qe kam gjerat po shkojne ngadale por duhet te kete me shume durim dhe duhet te keni me shume besim me njerezit e rinj qe punojne me gjeneratat e reja, duhet te kene nje vazhdimesi ne kete pune. duhet te kete me shume kushte per pune ngase kjo eshte nje prej kushteve shume te rendesishme. Une i di keto probleme, kane qene te pranishme edhe me pare ne Bosnje ndersa ato dalngadale po permiresohen keshtu qe une jam i bindur qe ata qe punojne dhe qe e duan kete sport, te japin nje shtytje qe te kete kushte optimale me gjeneratat e reja dhe pikerisht ketu duhet te bazohet puna me te rinjte. Nese do zoti qe kosova te pranohet nderkombetarisht, Federata e Futbollit e Kosoves do te jete pjese e rendesishme e futbollit nderkkombetar.

Ku gjendet tani Fuad Muquroviqi, a jeni te angazhuar ne ndonje klub?

Se fundi kam drejtuar perfaqesuesen e Bosnje e Hercegovines dhe pastaj nuk kam kerkuar dicka te vecante qe te drejtor ndonje ekip edhe pse kam pasur disa ftesa, mirepo tash jam penzionist, po pushoj dhe kohen pe kaloj me familjen time.

Meqe jemi ne fillim të vitit 2011, keni ndonje porosi per futobllistet ne Kosove?

Mund te them dhe ti uroj te gjitha te mirat ne vitin 2011 dhe siç biseduam me heret gjerat te rregullohen dhe futbolli kosovar me hapa te shpejte te shkoje drejt Evropes.

Intervistoi: Edmond Thaçi

Sporti shqiptar

Debatik Curri, futbollist kosovar që tash luan për skuadrën turke Genclerbirligi, aktualisht po qëndron në Kosovë. Vitin e Ri 2011 e ka pritur  në familjen e tij, në Lluga të Podujevës. Ai me kënaqësi ka pranuar një bisedë për portalin albaspox.com në të cilin edhe ai vet lexon lajme nga sporti kosovar. Fundi i vitit, zakonisht, është koha kur, pavarësisht profesioneve dhe vendeve të qëndrimit, njerëzit përpiqen që të gjejnë mundësinë dhe, të paktën, ndërrimin e moteve ta kalojnë në gjirin familjar.  Një pushim të këtillë, për të vizituar familjen e tij, shokë e miq gjithandej nëpër Kosovë, këtyre diteve është duke e shfrytëzuar edhe futbollisti kosovar, Debatik Curri, anëtar i skuadrës së Ligës së parë turke, Genclerbirligi të Ankarasë.

Debatik Curri, përndryshe, është edhe reprezentues standard i kombëtares së Shqipërisë, për  të cilën, deri tash, ka luajtur 32 ndeshje dhe ka shënuar një gol.

Për lexuesit në Portalin e lajmeve sportive, “albaspox.com”, Esad Ejupi ka zhvilluar një bisedë rasti me Debatik Curri-n,  të cilën po e japim në vijim.                                                             

Albaspox.com : Në skuadrën turke Genclerbirligi kaluat në afati veror të transfereve, mirëpo nuk vonoi shume dhe pësuat një lëndim (shtator 2010) qe ju largoj bukur gjate nga fusha e blerte. Si jeni tash , a jeni shëruar ne tersi dhe kur do te jeni i gatshëm për sfidat e reja ne 2011 ?

Debatik Curri: Menjëherë pas lëndimit që ndodhi pikërisht ashtu siç thatë ju, në shtator 2010, unë iu nënshtrova operacionit (30 shtator) në Belgjikë. Pastaj 3 muajt tjerë, në vijim, jam duke i kaluar në rikuperim, në një qendër të njohur të Belgjikës, e herë pas here shkoj edhe në Turqi. Tash ndihem më mirë. Me 10 janar shkoj prap në Belgjikë dhe diku kah fundi i marsit, fillimi i prillit pres që t’i kthehem fushës së blertë për lojë. 

Albaspox.com : Para këtij lëndimi keni zhvilluar disa ndeshje ne kampionatin turk, te i cili ju u transferuat nga Vorskla, skuadër kjo nga Ukraina. Cili është mendimi i juaj, çka i dallon këto kampionate, cili mendoni se është më cilësor ? 

Debatik Curri : Në Ukrainë janë 3-4 ekipe cilësore ndërsa të tjerat janë ekipe mesatare, ndërsa në Turqi është më ndryshe. Turqia e ka ligën shumë të fortë dhe me rivalitet të madh mes skuadrave sepse ka shumë ekipe cilësore në të cilat luajnë futbollistë shumë të njohur dhe yje që janë të njohur në gjithë Evropën. Pastaj në Turqi interesimi është shumë i madh, futbolli ka popullaritet të madh, stadiumet kane gjithmonë shumë shikues.

Albaspox.com : Me skuadrën Genclerbirligi keni kontratë deri me 30.06.2013. A po ndjeheni mirë në këtë klub, dhe a mendoni ta përmbushni këtë kontratë deri në fund, apo ndërkohë, keni oferta tjera ?

Debatik Curri: Tash për tash synimi im kryesor është shërimi i lëndimit që e kam. Pastaj më duhet që ta rikthej formën e mirë në fushë dhe të kem paraqitje të mira me skuadren Genclerbirligi. E kur të kam arritur këtë  mund të dalin edhe oferta tjera. Unë nuk kam shkuar në Genclerbirligi që të mbetem për gjithmonë aty.

Albaspox.com : Na thuani sinqerisht, në cilin kampionat do të kishit dëshirë të luanit, dhe a keni ndonjë skuadër që e preferoni, fanelën e së cilës me dëshirë do ta bartnit në një të ardhmen tuaj ?

Debatik Curri : Jane dy liga të cilat më joshin shumë. Është Bundesliga gjermane, dhe “Serie A” e Italisë. Ndërsa skuadra ime e preferuar, që nga vogëlia, ka qenë dhe mbetet Interi. Me kënaqësi do të veshja fanellën e kësaj skuadre.

Albaspox.com : Si i vlerësoni ju ndeshjet kualifikuese të kombëtares së Shqipërisë deri në këtë fazë. Aktualisht jeni në pozitën e tretë me 5 pikë nga katër ndeshje ?

Debatik Curri: Kemi pas paraqitje të mira në fillim të këtij edicioni. Mirëpo pastaj pasuan lëndime të shumta të futbollistëve standard që janë bartës të lojës dhe këto dy ndeshjet e fundit nuk dhanë rezultatet të dëshiruara. Jam i bindur se sikur të ishim komplet edhe në këto dy ndeshje sigurisht se do të nxirrnim edhe ndoj pikë më shumë.

Albaspox.com : Cilat janë gjasat që kombëtarja e Shqipërisë, më në fund, të marr pjesë në një kampionat evropian. A do të ndodhë kjo me 2012 ?

Debatik Curri : Pas rezultateve nga dy ndeshjet e fundit (baras me B.e H. dhe humbja në Bjellorusi) gjasat janë fare të vogla që këtë edicion të kualifikohemi për Euro 2012.

Albaspox.com :  Cili është mendimi i juaj çka duhet bërë për të krijuar një skuadër kombëtare që arrin të kualifikohet për ndonjë kampionat evropian apo botërorë ?

Debatik Curri : Në fakt, kombëtarja e Shqipërisë tash ka  një grup të mire lojtarësh në përbërjen e vet, por, për të arrit që, më në fund, të kualifikohemi për një ngjarje kaq të madhe të futbollit duhet që Shqipëria në vazhdimësi të ketë rezultate të mira dhe së paku për 3-4 vite të krijoj një ekip që do ta qonte Shqipërinë qoftë në Euro apo në Botëror.

Albaspox.com: Po reprezentacioni i Kosovës, si e shihni ju atë ?

Debatik Curri :Kam përcjellë ndeshjen e fundit që e ka zhvilluar në Suedi, dhe kam parë se vërtet ka potencial për një skuadër të mirë kombëtare. Unë shpresoj që në një të ardhme të afërt t’i mundësohet reprezentacionit të Kosovës që të marr pjesë në garat ndërkombëtare.

Albaspox.com: Cili është mendimi i juaj për ligen e futbollit në Kosovë? Nga këndi i juaj, a vëreni ju far ndryshimesh në te, a ka cilësi, a ka potencial çfarë organizimi ka, infrastruktura, mbështetja etj. Si i shihni ju të gjitha këto?

Debatik Curri : Dy vitet e fundit në Superligën e Kosovës më duket se ka ra cilësia, ndërsa në anën tjetër, këto vite është rritë disiplina. Më herët ka qenë e kundërta. Pse ka ra cilësia në futbollin e Kosovës mendoj se faktori kryesor është pamundësia e zhvillimit të ndeshjeve me karakter ndërkombëtar. Tash kanë kaluar 10 vite pas daljes nga lufta dhe akoma zhvillohen ndeshje të nivelit të njëjtë sikur edhe 9 vite tjera të paraluftës. Praktikisht këtu asgjë s’ka ndryshuar. Kjo ka bërë që të bie morali i futbollistëve, e bashkë me te edhe i investitorëve në futboll, e në fund edhe shikueshmëria dhe interesimi. Jam i bindur se prej momentit kur të jepet drita e gjelbër për ndeshje ndërkombëtare do të rritet edhe cilesia, edhe interesimi e do të shtohen edhe investimet qoftë në infrastrukturë, qoftë në futbollistë.

Albaspox.com : Në Turqi keni edhe futbollistin tjetër kosovar, po ashtu reprezentues te Shqipërisë, Lorik Canen. Takoheni ndoj herë me te atje ?

Debatik Curri : Po normalisht që kontaktojmë, bisedojmë. Zakonisht takimet i kemi kur grumbullohemi me kombëtare, përndryshe secili ka obligime ndaj skuadrave të veta pastaj largësia dhe të gjitha këto e bëjnë të veten.

Albaspox.com: Cilët janë koleget tuaj sportistë me të cilët mbani kontakte, qoftë me tel. msn, e-mail, facebook, etj …?

Debatik Curri : Jane disa kolegë të mi, futbollistë, me të cilët mbaj kontakte të vazhdueshme. Ata janë edhe nga Superliga e Kosovës, edhe nga liga e Ukrainës, edhe nga Kombëtarja edhe nga kampionati turk etj. Në këtë mes do te veçoja, Kushtrim Mushicën (bashkë në foto), Armend Dallkun, Ahmed Jonuzin, etj. Ndërsa ne skuadër te Genclerbirligi i kam edhe Labinot Harbuzin dhe Bekim Balajn.

Albaspox.com : Ndeshjen e sezonit vjeshtor kundër Galatasarajit të Lorikut, skuadra e juaj, Genclerbirligi e ka fituar, si mysafire, në Stamboll, 0:2. Çka mund të premtoni për ndeshjen tjetër që zhvillohet në Ankara, diku në muajin maj, në të cilën, besojmë se do të luani edhe ju ?

Debatik Curri : Për dalim nga Loriku që ndeshjen në Stamboll ka luajtur 90 minuta, unë, për shkak të lëndimit, nuk kam mundur të luaj, por ndeshjen e kam shikuar në TV . Skuadra ime ka qenë superiore gjatë gjithë ndeshjes dhe e ka fituar atë. Unë shpresoj që për ndeshjen e kthimit të jam në formacionin bazë dhe sigurisht se edhe atje do ta synojmë fitoren.

Albaspox.com: Meqenëse luani në pozicionin e lojtarit,  herë mbrojtës, e herë mesfushor defanziv, na thuani ju lutem, nga përvojat tua të deritashme, me cilin lojtar kundërshtar keni pasur vështërsitë më të mëdha për ta ndalur, kur e dimë se keni luajtur kundër emrave të njohur si Van Nistelrooy, Huntelarr, Sneider, Robben, pastaj, C.Ronaldo, Nani, Ibrahimoviç, Bentner, Berbatov, etj, etj ?

Debatik Curri: Po , është e vërtetë se  të gjithë ata emra që ju i përmendët kanë qenë pjesë e reprezentacioneve të veta përkatëse kundër të cilëve kemi luajtur. Natyrisht se kanë qenë të gjithë kundërshtarë të vështirë sepse janë emra të njohur të futbollit. Në këtë mes do të veçoja duelet me C.Ronaldon e Portugalisë dhe Zlatan Ibrahimoviçin e Suedisë të cilët vërtet ka qenë vështirë për t’i ndalur. Po ashtu mjaftë i pa përshtatshëm për mbrojtës është edhe Berbatov i Bullgarisë. Mirëpo unë besoj se pikërisht kundër këtyre futbollistëve emra të mëdhenj kam pasur paraqitjet më të mira. 

Albaspox.com: Të pëlqen jeta në Ankara, në përgjithësi? Ka vajza të bukura atje ?

Debatik Curri : Po, jeta në Ankara është e mirë, edhe pse për shkak të lëndimit të menjëhershëm pas kalimit tim atje unë u transferova ne Belgjike një kohë të gjatë. Ankara është qytet i madh ka mbi 7 milion banorë, prandaj edhe oferta aty është shumë e madhe për çdo gjë, sikurse edhe për vajza të mira. Mirëpo unë që moti kam qenë i orientuar që për shoqe të jetës ta zgjedh një vajzë shqiptare.

Albaspox.com : Kush do të jetë ajo që do ta kurorëzoj jetën në martesë me Debatikun, keni vendosur për këtë gjë ?

Debatik Curri : Po. Kam vendosur dhe ate tash në këtë pushim që jam në Kosovë. Më saktësisht më 26 dhjetor, jam fejuar. Është një e re prishtinase që studion në fakultetin e edukimit.

Albaspox.com: Po martesën, keni planifikuar ?

Debatik Curri: Martesën planifikojmë ta bëjmë në verën që po vjen.

Albasopox.com: Deri kur do të qëndroni tash në Kosovë?

Debatik Curri : Në Kosovë tash do të jem deri me 10 janar të këtij viti.

Albaspox.com: I përcillni zhvillimet në sportin kosovar, futbollin dhe te tjerat nga Turqia, apo ku do që jeni ?

Debatik Curri : Pavarësisht se ku gjendem, në Turqi, Belgjikë, apo më herët në Ukrainë, gjithmonë sy e vesh i kam kah Kosova dhe mundohem që për aq sa arrije të informohem me ngjarjet sportive që zhvillohen këtu. Tash kohëve të fundit kam një adresë të qëlluar për t’i gjetur këto informacione shumë aktuale dhe të shumta, është pikërisht portali i juaj  albaspox.com, për të cilin me duhet tu them se ju përgëzoj sepse vërtet po jepni informacione të shumta dhe aktuale të cilat për neve që jemi jashtë Kosove janë të mirëseardhura.

Albaspox.com : A keni diçka për t’i shtuar kësaj bisede për fund ?

Debatik Curri : Edhe unë ju falënderoj për këtë intervistë dhe meqenëse jemi në fillim të vitit të ri kisha shfrytëzuar rastin që të gjithë shqiptareve kudo që janë tu uroj Vitin e Ri me dëshirën për shëndet dhe suksese secili në fushën e vet të punës.  

Albaspox.com, në emër të gjithë juve, lexues të nderuar, ka falënderuar Currin për këtë bisedë të gjatë e të hapur, dhe njëkohësisht i ka dëshiruar atij që sa më shpejt të shërohet nga lëndimi dhe t’i kthehet fushës së blertë dhe lojës së futbollit.

Bisedën e zhvilloi : Esad EJUPI

Sporti shqiptar